《20世紀少年》- 一點也不科學的「本格科學冒險映畫」

Hin 周三 9月 24, 2008 12:23 pm

好難得我居然抽到首影飛有得去睇(毫無抽獎運之人一件), 又難得居然 8 號波我都去睇, 更難得我睇完係觀塘搭地鐵出旺角行路返屋企無被棵樹責死! (街口成棵樹倒塌... 唔係樹枝, 係主幹!)

期望本來幾高, 可惜睇完之後評分係:

5 分! 掙啲畀 4 分添!

why? 《20世紀少年》被喻為最無可能被影畫化漫畫作品之一, 不無道理.

一, 原漫畫時空交錯, 一時現代(1997~2015), 一時七十年代(1973), 不斷穿插, 要係電影裡邊表達呢種不同時空發生而又有連帶關係嘅故事, 仲要交代得令觀眾明白更係難上加難! 原漫畫版故事推進時間係 1997x1973 穿插(朋友出現)/2000x1973 穿插(血洗大除夕)/2015x1973 穿插(迦南長大), 我淨係寫大家都睇到 r 哂頭, 電影裡邊導演仲玩多尐, 1973>2015>1997>1973>2000>1973>2015, 跳吓跳吓咁去, 最後 "血洗大除夕" 前仲玩跳日期. 如果我唔係睇過漫畫版, 真係唔明點解佢要咁樣跳法, 好易甩到唔知佢講乜...

二, 原漫畫關鍵人物眾多, 拿起手十幾二十人, 雖唔算錯綜複雜, 不過要記住名再係細路同成人之間連繫, 係短短 140 分鐘(係, 我坐足兩粒鐘睇到 00:00...)內有機會令人頭暈轉向. 簡單舉個例, 最後 "血洗大除夕" 服部搵到「朋友」係一幢大廈天台上邊搖控緊巨大機械人, 最後同「朋友」一齊墮樓. 墮樓嘅「朋友」係邊個? 原漫畫版交代得清楚, 電影裡邊連一齊墮樓嘅服部係邊個, 細時做過乜都唔覺描寫過...

三, 人物唔複雜, 但情節就非常繁瑣. 電影版為求係短短 140 分鐘裡邊要交代到 "血洗大除夕", 大量節枝劇情都被刪去. 如警察追查敷島教授全家失蹤案嘅情節, 健次等人推敲「朋友」真正身份嘅情節, 眾人為搵出究竟「朋友」係邊度製造巨大機械人而四出追查, 「朋友」因為時間及技術關係無法製造巨大機械人而用汽球及大堆布絮掩飾, 服部與「朋友」墜樓前終揭開其忍者小靈精面具(漫畫有講係邊個)但其後「朋友」出現係巨大世博紀念物上令眾人一驚, 等等...

不過令我畀咁低分嘅主因都唔係以上三個理由, 最大劑係佢攪到一個原本好神秘嘅「朋友」更神秘, 神秘到我想觀眾無乜興趣知佢係邊個, 角色存在感薄弱. 咁就死得喇, 成個故事開頭最主要就係引起觀眾/讀者去猜測成件事嘅始作俑者究竟係邊個, 佢攪到「朋友」可有可無, 感覺上只不過係一名普通神棍. 更大劑係成個故事無哂緊張感, 無張力, 健次一眾為追查「朋友」身份四出頻撲, 續少續少收責範圍, 無講. 眾人為阻止「朋友」"血洗大除夕" 所做一切嘅熱血感, 無哂! 觀眾完完全全變成「觀眾」, 無代入感!哦~ 有機械人係東京噴毒霧. 哦~ 個機械人好巨大. 哦~ 健次去引爆佢. 哦~ 爆到樓都爛勁過原子彈但無人死... 阿堤幸彥導演, 你究竟想點?

如果唔係念在因為日本仔有膽將佢真人影畫化同個人係半個 20世紀 FANS 畀多一分, 真係畀 5 分都嫌多. 空想漫畫果然都係唔好影畫化...